Танилц: Цоо шинэ iPhone16 | Улаанбаатар Үнэт Цаасны Бирж

Биднийг унтаж байх зуур намрын хамгийн гал гарсан халуухан эвэнтийн нэг болох Apple (AAPL)-н шинэ бүтээгдэхүүн, технологио танилцуулах эвэнт болж өнгөрөв. Энэ удаагийн эвэнт “It’s Glowtime” нэртэйгээр зохиогдсон юм.

🫧 Гялалздаг Siri: Нэрээсээ л мэдэгдэж байгаа биз дээ? Siri-р хайлт болон зарим үйлдэл хийлгэхэд дэлгэцийн хүрээ гялалзсан хөдөлгөөнт дүрстэй харагдахыг? За энэ ч яах вэ, эвэнтийн гол эзэн iPhone 16-г сонжъё.

👆 iPhone 16: Товшилгүй, дар

iPhone 16-н бусдаас ялгарах гол ялгаа нь Action button болон Camera control. Гол санаа нь дэлгэцдээ хүрэлгүй утсаа удирдах боломж. Action button-н хувьд Apple зуны эвэнт дээр танилцуулж байснаараа утасны дуу хаах, гэрэл асаах гэхчлэн олон төрлөөр ашиглаж болох бол Camera Control-н тусламжтайгаар нэг даралтаар л зураг дарж, бичлэг хийх боломжтой болжээ. Минут, секундийг алдалгүй зураг, бичлэг хийх сонирхолтой хүмүүст бол хэрэгтэй л эд байна.

🚀 Шинэ чип: Цаашлаад, iPhone 16 нь iPhone 15-ын CPU-с 30% хурдан, 3 нм процесс бүхий A18 чипээр тоноглогдсон. Тус чип нь бусад AI чипээс дахин хурдан төдийгүй үндсэндээ Apple-н нэвтрүүлж буй AI-г илүү хурдан, үр дүнтэй ажиллахад туслах юм. Гар утсаа компьютер шиг тултал нь ашиглаж чаддаг бол iPhone 16 танд төгс тохирох шийдэлтэй утас. Харин бусад хүмүүст сүртэй ялгаа мэдрэгдэх нь юу л бол.

🤓 Камераа гаргаад ир, тайлбарлая: iPhone 16-г чимсэн хамгийн сонирхолтой шийдэл бол яахын аргагүй Visual Intelligence байлаа. Ажиллагааны хувьд ChatGPT шиг эргэн тойрноо AI-р тайлбарлуулах цаашлаад гудамжинд таарсан ресторан, дугуйн зургийг дараад л ямар төрлийн дугуй, хаана зарагдаж байгаа зэрэг олон төрлийн мэдээлэл авах боломжтой юм. Мэдээж үүний ард Google (GOOG) болон ChatGPT ажиллана.

Хамгийн том дэлгэц: iPhone 16 Pro-н дэлгэц 6.3 инч, iPhone 16 Pro Max-нх 6.9 инч бөгөөд энэ нь Apple-н гаргасан хамгийн том дэлгэцтэй утас болж буй. Түүнчлэн iPhone 16 Pro Max нь компанийн түүхэн дэх хамгийн сайн батарейтай утас хэмээн зарлаад амжив.

⌚ Шинэ цаг, 🎧 шинэ чихэвч

“It’s Glowtime”-н үеэр Apple Watch болон AirPods бүл нэмж Apple Watch Series 10, AirPods 4 тус тус танилцуулагдав. Цагны хувьд усны температур болон гүнг хэмжих, 30 минутад 80% хүртэл цэнэглэх боломжтой нь онцлог байсан бол H2 чиптэй AirPods 4 орчны дуу тусгаарлалтаараа бусад загвараасаа хамаагүй сайн гэдгээрээ давуу.

😇 Сонсголыг тань анхааръя: Аан бас, AirPods Pro дээр Hearing Protection функц нэмэгдэж байгаа бөгөөд хэрэглэгч сонсголоо шалгах, сонсголоо муудахаас урьдчилан сэргийлэх боломжтой болсон байна лээ шүү.

Энд хүрээд дэлхийн хамгийн үнэ цэнтэй брэндийн шинэ бүтээгдэхүүнүүд, нэвтрүүлж буй технологиудтай танилцаж дууслаа. Мартсанаас iOS 18-н хувьд зуны эвэнт дээрээ танилцуулсан шийдлүүд нь л нэмэгдэх бөгөөд ЭНД дарж дэлгэрүүлж уншаарай.

“It’s Glowtime”-г 5 үгээр тодорхойлбол “Шинэ бүтээгдэхүүнүүд, гялалздаг Siri, AI”.