Системийн хэмжээний ТОП-5 банкны нийт хөрөнгө 2026 оны III улирлын эцэст ₮83.2 их наядад хүрч, цэвэр ашиг нь ₮1.2 их наяд боллоо. Нийт ашгийн 46%-ийг ХААН Банк (KHAN) ганцаараа бүрдүүлсэн байна. Том зургаар 5 банкны 4-ийнх нь ашиг өссөн бол ганц банкных буураадахжээ.
⚡️🔺 4 банкны өсөлтийн хөдөлгүүр
ХААН Банк ₮550.9 тэрбумын ашиг буюу 2025 оны бүтэн жилийн ашгийнхаа 79%-ийг эхний 9 сардаа олов. Төрийн банк (SBM)-ны хувьд ашиг нь ₮102.7 тэрбумд хүрч, өнгөрсөн бүтэн жилийн гүйцэтгэлээ аль хэдийн давсан аж.
🪄 Худалдаа Хөгжлийн Банк (TDB)-ны цэвэр ашиг 17.4% өсөхөд татварын зардлын бууралт гол түлхэц болов. Тухайлбал, тус банкны татварын өмнөх ашиг ₮167.8 тэрбум байхад орлогын албан татварын зардалд ердөө ₮26 сая тусгагджээ. Харин ХасБанк (XAC)-ны талаар ЭНД-ээс уншаарай.
🥴 Голомт банкны ашиг буурахад юу нөлөөлөв?
Нөгөө талд Голомт банк (GLMT)-ны цэвэр ашиг 9.4% буурч, ₮227.8 тэрбум болсон. Өөрөөр хэлбэл, ТОП банкнуудын жагсаалтаас ганцаар улайсан хэрэг. Өсөлт саарахад хүүгийн цэвэр орлого ₮341 тэрбумаас 19% агшсан нь голлон нөлөөлөв. Хадгаламж болон гаргасан үнэт цаасны хүүгийн зардал өссөнөөр нийт хүүгийн зардал 23% нэмэгджээ.
⚒️ Зээлийн чанарын зааг ба эрсдэл
Банкнуудын зээлийн чанарын үзүүлэлт хоорондоо тод ялгаатай. ХХБ-ны чанаргүй зээлийн харьцаа оны эхэнд 4% байсан бол 5.5% болж өссөнөөр ТОП-5 банк дундаа хамгийн өндөр түвшинд хүрэв. Муу ангиллын зээл нь ₮252 тэрбумаас ₮348 тэрбум болж нэмэгдсэнээр тус банкны эрсдэлийн сангийн зардал өмнөх бүтэн жилийнхээс давжээ.
🏦 Хөрөнгийн зах зээлийн үнэлгээ
Хөрөнгийн зах зээл эдгээр санхүүгийн ялгаатай байдлыг хувьцааны үнэлгээндээ шууд шингээж байна. ХасБанкны зах зээлийн үнэлгээ 90.7% өссөн бол нөгөө талд ХХБ-ны үнэлгээ 44.9% унасан. Банкны салбарын ашигт ажиллагаа ерөнхийдөө өндөр түвшинд хадгалагдаж байгаа ч хөрөнгө оруулагчдад бусад үйл ажиллагаа, үзүүлэлт ч чухал болсны илрэл дээ.
7000-0501
