Дэлхийн хамгийн том чип үйлдвэрлэгчдийн нэг TSMC (2330.TW)-г Тайванийн компани гэдгийг мэдэхгүй хүн ховор билээ. Тэгсэн TSMC-н хувьцааны тасралтгүй өсөлт Тайванийн хөрөнгийн зах зээлийг дэлхийн ТОП-5-д бичигдэхэд хүргэжээ. За тэгээд юу болсныг харцгаая.
🇹🇼 Тайванийн томролт
Одоогоос бараг л сарын өмнө Тайванийн хөрөнгийн зах зээлийн нийт үнэлгээ $4.14 их наядад хүрч, Их Британийн $4.09 их наядын үнэлгээг ардаа орхисноор дэлхийд 7-д эрэмбэлэгдэж байв. Харин өчигдрийн арилжаагаар Тайванийн зах зээлийн үнэлгээ нь $4.95 их наядад хүрснээр дэлхийд 5-т буюу Энэтхэгийн зах зээлийг анх удаа гүйцэж түрүүлээд байна.
⭐️ Онцгой өсөлт: Сонирхолтой нь Тайванийн хөрөнгийн зах зээлийн 42%-ийг $2330.TW нь дангаараа бүрдүүлдэг бөгөөд 2026 он гарснаас хойш компанийн нэгж хувьцааны үнэ 47% өсөж NT$2,270-т хүрээд байна.
💎 TSMC-н давуу: Энэхүү өсөлт нь AI-н эрэлтээс улбаатай. Тухайлбал, технологийн аваргууд болох Nvidia (NVDA) болон Apple (AAPL) нь TSMC-н чипийг үйл ажиллагаандаа ашигладаг бөгөөд технологийн аваргууд нийтдээ энэ онд AI-н дэд бүтцэд $650 тэрбум гаруй зарцуулахаар төлөвлөөд байна
🔎 Санхүүг нь ухвал
Энэ оны I улиралд компанийн орлого өмнөх оны мөн үеэс 35% нэмэгдэж $35.9 тэрбумд хүрчээ. Ингэснээр цэвэр ашиг өмнөх оны мөн үеэс 58.8% өсөж $18.1 тэрбум болсон нь шинжээчдийн таамгийг эвдсэн үйл явдал байв. Мөн тайлант хугацаанд $11.1 тэрбумын хөрөнгө оруулалтыг технологийг сайжруулалтад зарцуулсан байна.
Эцэст нь… Хөрөнгийн зах зээлийн үнэлгээгээр Ази тивийн орнууд дэлхийн ТОП-10 улсын 6-г бүрдүүлэх болжээ. Үүнээс харахад Галзуу баян Азиуд гэдэг шиг л том хөрөнгийн зах зээлтэй Азиуд болсон байна шүү.
7000-0501
