Утаатай, түгжрэлтэй дүн өвлийн улиралд халуун орон руу аялах Монголчуудын тоо жилээс жилд огцом хурдаар нэмэгдэх болсон. Тэгвэл өнөөдөр хүмүүсийн хүсэмжит Зүүн Өмнөд Азийн аялал жуулчлалын төв болсон улсууд руу хэр их хүн аялж буйг харцгаая.
🔥 Галзуу өсөлт
Тэртээ 2015 онд Вьетнам болон Тайланд руу ердөө 1.4 мянган зорчигч аялж байсан бол өнгөрсөн онд нийт 34.4 мянган хүн эдгээр 2 улс руу зорчжээ. Энэ нь 2015 онтой харьцуулахад 24 дахин өссөн үзүүлэлт юм. Нарийвчлан харвал, сүүлийн 10 жилд Монголоос Вьетнам руу аялсан иргэдийн тоо 108.7 дахин өсөж 20.9 мянгад, Тайланд 10.9 дахин нэмэгдэж 13.4 мянгад хүрсэн. Энэхүү өсөлт нь эдгээр улсуудын аялал жуулчлал салбар огцом хөгжсөнтэй холбоотой.
🇻🇳 Вьетнам хурдалсаар: 2024 онд Вьетнам 17.5 сая жуулчин хүлээж авсан нь мөн үеэс 38.9% өсжээ. Мөн аялал жуулчлалын салбараас $33.2 тэрбум орлого олсон аж. Тус орныг зорих голлох шалтгаан нь аялахад өртөг бага. Жишээлбэл, жуулчдын нэг өдрийн дундаж зардал Тайландаас 10%–20% бага буюу $25-$40 хооронд хэлбэлздэг байна.
🇹🇭 Тайланд томорсоор: Өнгөрсөн онд Тайланд руу зорчсон жуулчдын тоо 35 саяд хүрч, аялал жуулчлалын орлого $48 тэрбум болсон. Сүүлийн жилүүдэд тэд “Amazing Thailand” компанит ажлыг амжилттай хэрэгжүүлж, далайн эрэг, амтат хоол, тодорхой бүс нутгаар хууль ёсоор зөвшөөрөгдсөн каннабис хэрэглээ зэрэг нь жуулчдыг ихээхэн татдаг аж.
Эцэст нь… Зүүн Өмнөд Азийн цаг агаарын хамгийн тааламжтай үе манай өвөлтэй давхацдаг нь Монголчууд эдгээр орнууд руу ихээр зорчих болсны нэг хүчин зүйл байх талтай. Ер нь манай лимонууд гадаад руу аялахдаа юуг харгалзан үзэж байна? 🕶️
7000-0501
