Дэлхийн томоохон брэндүүд Хятад дахь бизнесээ авч үлдэхийн тулд Хятад түншүүд хайж эхэлжээ.
🤧 Тэсэж үлдэх тэмцэл
Тухайлбал, Starbucks (SBUX), Decathlon, Häagen-Dazs, Peet’s Coffee, Costa Coffee, Lawson, GE HealthCare тэргүүтэй брэндүүд Хятад дахь бизнесээ хэсэгчлэн эсвэл бүхэлд нь зарах, аль эсвэл Хятад түншүүд хайх гэхчлэн зах зээл дэх байр сууриа авч үлдэхээр хичээж байна.
☕ Дэлхийн хамгийн том кофены сүлжээ Starbucks л гэхэд саяхан Хятад дахь бизнесийнхээ 60%-ийг Хонконгод төвтэй Boyu Capital-д худалдахаар тохиролцжээ. Boyu Capital нь Хятадын Ерөнхийлөгч асан Зян Зэминий ач хүү, Зян Жичэнгийн үүсгэн байгуулсан компани юм.
🤑 Ойролцоогоор $4 тэрбумаар 60%-иа худалдсан гэгдэж байгаа бөгөөд хариуд нь Starbucks Хятад дахь борлуулалтынхаа тодорхой хэсгийг лояалти байдлаар авах аж. Мөн ойрын хугацаанд тэд Хятадад байршиж буй 8,000 салбараа 20,000 болгох зорилт тавьжээ.
💥 Их тэсрэлт
Саяхан Монголд нээлтээ хийсэн Luckin Coffee гэхэд дотоодын зах зээлдээ Starbucks, Peet's, Costa нийлснээс 3 дахин их буюу 26,206 сүлжээ дэлгүүртэйгээр үл ажиллагаа явуулж байна. Ер нь л Хятад компаниуд дотооддоо гэлтгүй гадагш эрчимтэй тэлэх болсон. BYD (1211.HK)-с эхлээд Huawei, Labubu-н үйлдвэрлэгч Pop Mart гэхчлэн олон улсын зах зээл рүү эрчимтэй тэлж буй Хятад компаниуд дэлхийн луугар компаниудтай зах зээлийн хувь булаацалдах хэмжээнд өрсөлдөж байгаа.
😔 Хятад компаниудын тэсрэлттэй өсөлтөөс үүдэн Шанхай дахь Америкийн худалдааны танхимаас өнгөрсөн 9-р сард явуулсан судалгаагаар, Америк компаниудын Хятад дахь бизнесээ харах өнцөг түүхэн доод хэмжээнд хүрч, гишүүн компаниудынх нь дөнгөж 41% нь л бизнесээ өөдрөгөөр харж байна.
👀 Тэдний тодорхойлсноор Хятад дахь бизнесийнх нь хамгийн том аюул нь Америк, Хятадын хурцадмал байдал.
Эцэст нь… 2023 онд Америк, Хятадын харилцаа эрс муудах үед дэлхийн томоохон компаниуд Хятадаас гарах талаар хэлэлцэж байсан бол харин одоо дотоодын түнштэй болж, ашиг хүртэх нь илүү дээр гэж харж байна. Хятадын эдийн засаг хямарч, хямралаасаа гарах болоогүй гэгдэж байгаа ч дотоодын компаниуд нь бизнесээ тэлсээр, гадаад зах зээлд эрчтэй үзэлцэж, дэлхийн бизнесийн ертөнцийн өнгө төрхийг бүрдүүлэх болжээ.
7000-0501
