Өнгөрсөн долоо хоногт Америкийн завсрын сонгуулиар Ардчилсан нам Конгрессын дээд, доод танхимын аль алинд нь ялалт байгуулсан. Гэвч хөрөнгө оруулагчид тус мэдээг арай өөрөөр хүлээн авч, зах зээлийг цэнхэр цунами дайраад өнгөрлөө.
📉 Nasdaq-н түүхэн уналт
Технологийн салбарын нэрийн хуудас болсон NASDAQ (^IXIC) индекс өнгөрөгч Пүрэв гарагт 5.5% огцом унаж 24,315 нэгжид хүрчээ. Энэ нь 2025 оны 4-р сараас хойших хамгийн огцом уналт болж, зах зээлийн үнэлгээ нь даруй $2.5 их наядаар багассан аж. Тус уналтын гол шалтгаан нь Ардчилсан намын ялалт технологийн томчуудад чиглэсэн хатуу зохицуулалт авчирч магадгүй гэсэн болгоомжлол байв.
🫵🏻 Тэр дундаа дата төвүүдийн эрчим хүчний хэрэглээнд хяналт тавьж, зарим мужид дата төвийн барилгын ажлыг царцааж магадгүй гэх яриа хөрөнгө оруулагчдыг сандаргажээ.
🚨 Чипийн час өдөр
Энэ өдөр хамгийн хүнд цохилтыг чип үйлдвэрлэгчид амслаа. Тодруулбал, NVIDIA (NVDA)-н нэгж хувьцааны үнэ 9.3%, AMD (AMD)-н нэгж хувьцааны үнэ 17% тус тус унажээ. Мөн AI дэд бүтцэд чухал байр суурийг эзэлдэг компаниуд болох CoreWeave (CRWV), Nebius (NBIS)-н хувьцаа ч огцом унасан бөгөөд шинжээчид үүнийг AI-н хэт өндөр хүлээлт бодит байдалтай нүүр тулж буйн дохио гэж үзжээ.
🔙 Эргэн ирэлт: Харин Баасан гарагт зах зээл эргэн сэргэж, дээр дурдагдсан компаниудын хувьцааны үнэ дунджаар 6.9% өссөн бөгөөд NASDAQ 1.1% өсөж 24,579 нэгж дээр хаагдсан байна.
Эцэст нь… Цаашдын Америкийн улс төрийн шийдвэрүүд зах зээлд хэрхэн нөлөөлөх нь тодорхой бус хэвээр байна. Гэхдээ нэг зүйл тодорхой байгаа нь AI-н өсөлтөд итгэл үнэмшил дүүрэн хөрөнгө оруулагчид технологийн дэвшлээс гадна улс төрийн эрсдэлийг ч тооцох шаардлагатай болжээ.
7000-0501
