Монгол улсын Засгийн Газар дэлхийн хөрөнгийн удирдлагын томоохон компаниудын нэг Франклин Темплтоныг хүлээн авч Монгол улсын төрийн болон орон нутгийн өмчийн компанийн засаглал, төрийн өмчийн өмчлөлийн бодлогыг шинэ түвшинд гаргаж олон улсын жишигт нийцсэн мэргэжлийн удирдлагатай болгох харилцан ойлголцлын санамж бичиг байгууллаа. 
Төрийн өмчит компанийн өнөөгийн нөхцөл байдлыг шинжилж Blackrock, JP Morgan, Goldman Sachs, Morgan Stanley, Franklin Templeton зэрэг дэлхийн санхүүгийн зах зээлд тэргүүлэгч 12 байгууллагад энэ чиглэлээр хамтарч ажиллах саналыг ирүүлэхийг уриад байсан. Эхний үр дүнд Франклин Темплтон компани цаашдын сонгон шалгаруулалтанд оролцох сонирхлоо илэрхийлж Монгол улсад хүрэлцэн ирлээ.
Ингэснээр бид төрийн болон орон нутгийн өмчийн компанийн үр ашгийг нэмэгдүүлэх бэлтгэл хангах, чадавхыг бэхжүүлэх цаашид олон улсын санхүүгийн зах зээлээс хөрөнгө оруулалт татах чиглэлээр суурь судалгааг хийж замын зураглалыг хамтдаа гаргах болно. Энэ бол төрийн өмчийн үнэ цэнийг өсгөх, засаглал менежментийг олон улсын түвшинд хүргэх Монгол улсыг чиглэсэн хөрөнгө оруулалтын шинэ суваг бий болгох үйл ажиллагааны бодит эхлэл болно хэмээн үзэж байна.
Төрийн өмчит компаниуд ил тод, үр ашигтай өрсөлдөх чадвартай олон улсын хөрөнгө оруулагчид итгэж болохуйц засаглалтай байх ёстой юм. Өнөөдрийн байгуулсан энэхүү санамж бичиг бол зөвхөн санхүүгийн хэлцэл биш. Энэ бол төрийн өмчийг үнэгүйдүүлэхгүй, харин үнэ цэнтэй болгоход чиглэсэн шинэчлэл байх болно. Төр бизнесийн өдөр тутмын менежментээс шат дараатай холдож бодлого тодорхойлогч, зохицуулагчийн үндсэн үүрэгтээ төвлөрөх эхний бодитой алхам юм.
Энэхүү ажил нь Монгол улсын хөрөнгийн зах зээлийн хөгжилд маш том нөлөө үзүүлнэ гэж бид итгэж байна.
Эх сурвалж: Монгол Улсын Засгийн Газар
7000-0501
