Энэ жилийн TOKEN2049 чуулганд Nasdaq, BlackRock, Franklin Templeton, Morgan Stanley, J.P. Morgan, CME Group зэрэг дэлхийн санхүүгийн томоохон байгууллагууд идэвхтэй оролцсон нь дижитал хөрөнгө санхүүгийн зах зээлийн үндсэн урсгалд улам гүн нэвтэрч байгааг харууллаа.
Хэлэлцүүлгүүдийн гол сэдэв нь бодит хөрөнгийг токенжуулах, хөрвөх чадварыг нэмэгдүүлэх, барьцаа хөрөнгийн ашиглалтыг сайжруулах, арилжаа болон төлбөр тооцоог илүү шуурхай болгох боломж байв.
Nasdaq-ийн гүйцэтгэх захирал Адена Фридман токенжуулалт нь дэлхийн санхүүгийн системд түгжигдсэн олон арван тэрбум ам.долларын хөрөнгийг чөлөөлж, эргэлтэд оруулах боломжтойг онцоллоо.
Тухайлбал, АНУ-ын Засгийн газрын үнэт цаас, хувьцаа, мөнгөний захын сангийн нэгж эрхийг токенжуулснаар эдгээр хөрөнгийг шилжүүлэх, барьцаанд ашиглах, дахин ашиглах үйл явцыг илүү шуурхай, уян хатан болгох боломжтой. Үнэт цаас болон түүний төлбөрийн мөнгөн урсгалыг уялдуулан токенжуулах нь кастодиан, клирингийн тусдаа системүүдийн хооронд үүсдэг саатлыг бууруулах ач холбогдолтой.
Мөн 24/7 арилжааны эрэлт нэмэгдэхийн хэрээр эрсдэлийг бодит цагийн горимоор хянах, хиймэл оюун ухаанд суурилсан тогтолцооны хэрэгцээ өсөж байна. Үүний зэрэгцээ стейблкойны зохицуулалтын хүрээг бүрдүүлсэн АНУ-ын GENIUS Act зэрэг хууль эрх зүйн өөрчлөлтүүд санхүүгийн байгууллагуудын оролцоонд түлхэц өгч байна.
BlackRock, Franklin Templeton зэрэг хөрөнгийн удирдлагын компаниудын анхаарал ч токенжуулсан сан, бодит хөрөнгө болон хөрвөх чадвар багатай хөрөнгийг зах зээлтэй холбох боломжид төвлөрч байлаа.
Монголын хөрөнгийн зах зээлийн хувьд ч энэ чиг хандлага чухал. Бонд, сангийн нэгж эрх болон бусад үнэт цаасыг токенжуулах боломжийг судлахдаа хөрөнгө оруулагчдын хүртээмж, хөрвөх чадвар, өмчлөх эрхийн баталгаажуулалт, төлбөр тооцоо, эрсдэлийн удирдлагыг цогцоор нь авч үзэх шаардлагатай.
Токенжуулалтын бодит үнэ цэнэ нь хөрөнгийг дижитал хэлбэрт шилжүүлэхээс гадна түүнийг илүү үр ашигтай ашиглаж, санхүүжилт болон хөрөнгө оруулалтын шинэ боломжийг нээхэд оршино.
7000-0501
